車仔要“篤”數

2014-01-26 07:26:56 来源:网络

車仔要“篤”數


今晚繼續有英格蘭足總盃,輪到另一豪門車路士出擊,對住在聯賽輸波仇家史篤城,借助六連勝氣勢,誓要在自己地頭有仇報仇。

史篤城一向靠主場搵食,踢作客就真係差到冇朋友,十一戰只得一勝兩和八負,只攻入八球失廿四球,係英超之中最差一隊,作客恐懼症相當嚴重。更何況往績去到史丹福橋球場未贏過,今戰想爆冷都難。初盤車路士讓球半,推介車仔“篤”定過關。

車仔上仗打曼聯唔算精彩,好在有伊圖翻生,連中三元為球隊鎖定勝局。加埋托里斯,兩位過氣射手近期都時有佳作,夏薩特、拉美利斯、韋利安及林伯特等亦保持一定水準。車仔持續有穩定發揮,呢方面不得不讚老摩領軍能力。至於今晚一戰,由於之前在聯賽輸過畀史篤城,相信老摩會較為謹慎,加強針對性打法,力求一場過將對手擊倒。

以英超中游班嚟講,史篤城人腳屬於中上,鍾斯、哥洛治、阿當、禾達斯及柏拉斯奧斯等,都係身經百戰沙場戰將,喺英超應該企得住腳。惜整體戰力明顯與車仔仍有差距,今戰唔期望太高。

推介:車路士2:0