PSG皇馬大火併

2018-02-14 12:08:24 来源:互联网

C朗尼馬引發最強激戰

今晚歐聯16強爆發重量級大戰,力爭3連霸嘅「銀河艦隊」皇家馬德里,首回合坐鎮主場迎戰法甲豪門巴黎聖日耳門(PSG)。皇馬今屆捧盃目標剩餘歐聯,戰意十足,由歐聯史上入球最多嘅C朗擔大旗定必搶攻,但PSG亦坐擁風頭躉尼馬、卡雲尼及基利安麥巴比組成嘅鐵三角,今屆球隊更以25球打破歐聯歷來分組賽入球最多紀錄,鬥攻格局實多波入,中位數3.5球大盤不容錯過。

(有線61、64、201及203台周四凌晨3時45分直播)

BBC組合撻番着

皇馬依家喺西甲落後榜首巴塞隆拿17分,西盃亦喺8強出局,歐聯已成為佢哋今季唯一捧盃希望。「銀河艦隊」今屆分組賽雖然屈居熱刺之下以次名出線,不過王牌射手C朗依然交足功課,6仗分組賽個人攻入9球,除咗喺射手榜領先外,歷來於歐聯更累積114球,係史上入波最多球員,配合回勇嘅箭頭賓施馬及快翼加里夫巴利,近兩屆協助皇馬成功衞冕歐聯嘅「BBC」組合仍然強勁,首回合必藉地利主動出擊搶先機。不過右閘丹尼爾卡華積今仗要坐波監,令防線有後顧之憂。

聖日耳門分組入球破紀錄

近年橫掃法甲球壇嘅PSG亦唔嘢小,上年接連以天價簽入兩大球壇天之驕子尼馬及基利安麥巴比,連同球隊史上「士哥王」卡雲尼,終極目標當然要染指從未贏過嘅歐聯錦標。PSG今屆6仗分組賽5勝1負,唯一敗仗只係最後一輪喺篤定出線下不敵拜仁,而且於6場分組賽狂轟25球,當中有5場入波達4球或以上,打破多蒙特保持嘅21球舊紀錄,成為歐聯改制以來分組賽入球最多球隊,當中鐵三角尼馬、卡雲尼及麥巴比佔咗16粒,火力全開唔係人咁品,今場爭取作客入球肯定猛攻,勢必同皇馬鬥攻,中位數3.5球大盤有2.05倍值得捧場。
 

论坛精华