英格蘭應點做?

2018-07-11 11:50:37 来源:互联网

忽然被唱好
今晚世盃續有4強大戰,由克羅地亞硬撼英格蘭,我相信10個有9個香港人,都希望「三獅兵團」贏波殺入決賽。不過,克羅地亞坐擁攻守兼備嘅兩大中場莫迪歷及拿傑迪錫,絕對唔容易對付,英格蘭一定要做到以下幾點。

調整心態用人不疑
由於英格蘭喺全球擁有勁多粉絲,今次係佢哋28年來再度殺入世盃4強,難免被熱捧,我認為愈係高調或愈被睇好,就愈要調整心態,因為「三獅兵團」今屆表現突出,正正因為被睇淡下低調出征,依家忽然被唱好,切忌自滿或畀太大壓力自己,呢樣非常考領隊嘅功力。其次係認清自身強項及弱點,英格蘭改踢3人防線,連同2名翼衞上上落落,以及佐敦軒達臣殿後包位,主帥修夫基先做好防守嘅意圖非常明顯,因此進攻倚重反擊及死球戰術,就算史達寧屢做敗家仔,但佢嘅速度及牽制力,的確係重要殺着,既然呢個方程式已成型,就要做到用人不疑。

從英格蘭衝破12碼魔咒,係眾將勤於練習嘅成果,證明修夫基係一名做實事、唔玩花巧嘢嘅教頭,並用自身嘅經歷(12碼宴客)去言傳身教。據聞修夫基年薪僅排世盃主帥榜第7位,唔算好高,今屆英格蘭星味亦較為黯淡,到底「修哥」是否蔗渣價錢,教出燒鵝味道的領隊?撇開情感因素,以波論波,克羅地亞實力係秤先,但佢哋老將較多搏到殘,英軍唔係冇機會偷雞,我認為今仗係勢均力敵,好大機會要打加時,甚至互射12碼先分出高下,因此我會貼和波,不妨補多個波膽1比1。