墨爾本城上盤抵撐

2018-11-09 11:59:48 来源:互联网

近5次主場專恰鳳凰
周五下午澳職獨腳戲,墨爾本城將會主場迎戰威靈頓鳳凰。墨爾本城上仗雖然輸畀FC悉尼,被打破聯賽不敗金身,不過對手太強輸波都唔怪得佢哋,今場對住作客例牌曳嘅鳳凰,墨爾本城贏面依然高好多,讓一球嘅上盤捧得過。

(Now 639、有線615及655台周五下午4時50分直播)

兩軍上輪齊齊遭遇今季聯賽首場敗仗,其中墨爾本城主場慘吞3蛋,威靈頓鳳凰亦以同樣比數輸畀西悉尼流浪者。不過相比之下,墨爾本城輸波情有可原,皆因對手FC悉尼係近兩季常規賽盟主,實力有番咁上下唔易砌。為咗打開今季主場勝利之門,墨爾本城今仗肯定施展渾身解數,加上隊長占美遜復出有助提升士氣,球隊近5次聯賽主場面對威靈頓鳳凰又大獲全勝,往績絕對有保證。

鳳凰作客腳仔軟
嚟自新西蘭嘅威靈頓鳳凰,因為地理關係,作客表現向來都好差,上季14場常規賽作客錄得1勝2和11負劣績,係典型主強客弱型球隊,其中作客入球數字更錄得驚人嘅個位數,可以話離開自己地頭後毫無還手之力。鳳凰季前踢澳足盃,就曾作客曾以0比1輸畀地區弱旅賓特利綠軍,今季首輪聯賽作客布里斯班獅吼亦只能悶和0比0,可見客戰攻力疲弱嘅問題依舊,咁嘅狀態點會有力向墨爾本城搶分?寧願捧番墨爾本城上盤好過。

赢家联盟