紅軍搶分勢破卡城

2019-04-21 10:18:11 来源:网络

埃及文明發功進襲
今晚英超爭標關鍵戰,利物浦作客硬撼卡迪夫城。紅軍嚟到季尾衝刺階段及時回勇,尤其係「埃及文明」鋒線弗到漏油,挾8連勝強勢,造訪黑到冇朋友嘅卡迪夫城,有力大勝而回,就算讓球盤讓1.5/2球,照捧上盤。

(Now 621周日晚11時直播)

嚟到季尾階段,利物浦同曼城於爭逐聯賽冠軍路途上你追我趕,現時紅軍落後曼城1分,加上餘下賽程比曼城易踢,絕對有權捧走球隊英超首冠。利物浦近期的確弗到爆燈,連同上周中歐聯作客以4比1大炒波圖,兩回合計贏6比1殺入4強在內,近8仗全部贏晒。走出早前連番失分嘅困局,關鍵莫過於穆罕默德沙拿、沙迪奧文尼及羅拔圖法明奴組成嘅「埃及文明」鋒線重拾射門鞋,紅軍近8戰所入嘅22球入面,上述3人就佔咗15粒,腳風明顯轉順。

黑仔卡城谷前仲大鑊
另一邊廂,雖然卡迪夫城喺上周中補賽贏白禮頓2粒,但護級形勢仍然嚴峻,而且佢哋近期「人衰行路打倒褪」,先喺3月尾因旁證睇漏車路士越位入球而反輸1比2,前仗輪到球證收回原本判畀卡城嘅12碼決定,以致淨吞般尼2蛋,嚴重打擊士氣。何況卡城遇強經常腳軟,近4次聯賽主場迎戰Big6球隊悉數輸晒,其中3場更至少輸3粒,表現完全唔夠班,加上搶分心切,今晚主場出擊或想略為谷前,隨時益晒紅軍打反擊,讓球盤利物浦讓1.5/2球都冇有怕,直取上盤。