孫興民着火熱刺速決白禮頓

2019-04-23 16:58:15 来源:网络

周三凌晨英超補賽,熱刺主場鬥白禮頓。熱刺喺新主場出擊弗到漏,就算有王牌前鋒哈利卡尼養傷,球隊都仲有狀態大勇嘅南韓前鋒孫興民擔大旗,呢場對住作客Big 6強隊即屈嘅白禮頓,熱刺有望乘主場之利再搶攻,半場主勝值博。(Now 621周三凌晨2時45分直播)

熱刺早前喺歐聯力挫曼城闖入歐聯4強,表現爭氣,不過球隊返到聯賽即刻畀曼城成功復仇,以0比1輸波,爭奪前4形勢再度告急,聯賽剩下4輪嘅情況下,嚟緊熱刺可以話1分都唔少得。好彩熱刺前鋒孫興民近期再度挺身而出,喺「哈神」傷出呢段時間,表現愈踢愈弗頻頻搶士哥,包括早前歐聯次回合面對曼城梅開二度,絕對係熱刺近期前場最值得信賴嘅攻擊手,配合巴西快翼盧卡斯莫拉同中場核心基斯甸艾歷臣支援,熱刺火力唔講得少。

相反「海鷗」白禮頓近5場聯賽未贏過之後,已經跌落降班區邊緣,話就話要為護級搶分,不過白禮頓實力認真疲弱,尤其前線火力堪憂,各項賽事近6仗都食白果。加上「海鷗」今季5次作客Big 6球隊唔止輸晒,全部半場就已經落後,同強隊嘅實力差距表露無遺,呢場主力攻擊手安東尼洛卡特仲要坐埋波監,根本冇力同熱刺搶分,睇怕白禮頓呢場又要由頭輸到落尾,捧半場主勝好過。