史特加柏林聯走地入球騷

2019-05-23 10:23:19 来源:网络

東網今晚又有免費直播德國波,德甲附加賽首回合,德甲尾3嘅史特加主場迎戰德乙第3嘅柏林聯,兩隊會踢主客兩回合賽事,決定下季最後一個德甲名額誰屬,今場我哋安排咗英語旁述,馬會足智彩亦提供即場投注畀大家玩走地,記得準時上東網睇好波啦!

(on.cc東網周五凌晨2時30分直播)

史特加今季淪落到要踢附加賽,講表現當然唔好,但到咗季尾已經知恥近乎勇,起碼主場兩連勝大大增強咗護級信心。新帥韋寧亦早早有心理準備踢附加賽,今晚集中精神,主場踢首回合必定搶攻,希望有個好開始。睇番近10屆德甲附加賽成績,只有2011至12年球季,係乙組第3嘅杜塞爾多夫越級挑戰成功,兩回合合計擊敗甲組尾3嘅哈化柏林升上德甲,其餘9屆都係由甲組尾3球隊成功護級,呢個數據確實令史特加更添搶攻信心。

柏林聯主動出擊
不過乙組仔柏林聯創會113年以來,都未升過上最高級別嘅德甲,今次有機會創造歷史時刻,球會上下自然格外肉緊。柏林聯今季作客成績一般,只排德乙第9唔算特出,但細心一睇作客輸波率亦唔高,特點係柏林聯好肯攻,佢哋近12場作客賽事之中,有10場成功攻破對手最後防線。回顧煞科日柏林聯落後兩球下連追兩粒,若非發力太遲,睇個勢反勝波琴絕對有機會,升上德甲席位亦一早落入柏林聯手中,吸取過教訓後,預期呢支乙組仔今晚唔會坐以待斃,今仗大有可能係一場入球騷,投注建議最好睇到其中一隊入波後,走地追大盤就啱數。