拜仁當頭起大晒

2020-05-30 08:38:03 来源:网络

兵多將廣主場贏到盡
今晚德甲壓軸尾場,「1哥」拜仁慕尼黑喺主場出戰弱旅杜塞爾多夫。拜仁啱啱周中贏完「國家打吡」,奪冠機會高唱入雲,今仗必定乘勝追擊強攻對手,不過杜塞爾多夫為搶分護級唔會縮,焗住放手一搏,加上近5次聯賽交鋒,4次總入球達5球或以上,4.5球嘅入球大乃不二之選。

(無綫85台、Now 670、有線651及611台周日凌晨零時30分直播)

拜仁慕尼黑喺啱啱周中快車嘅「國家打吡」,雖然兩大「Goal手」羅拔利雲度夫斯基同湯馬士梅拿食白果,一樣憑住甘美治妙絕笠射,作客以1比0擊敗勁敵多蒙特,並且甩開「蜜蜂兵團」7分,為聯賽8連霸贏得極為關鍵一仗。查實拜仁氣勢如虹,近14場聯賽取得13勝1和,合共轟入46球,其中9場總入球達4球或以上。當中主場出擊經常大炒客軍,包括以6比1狂數雲達不來梅、以5比0大勝史浩克04,上周末又贏法蘭克福5比2,可見拜仁喺主場要贏到盡,而中途接手嘅主帥漢斯弗利克,各項賽事帶隊24仗豪取21捷,勝率高達88%,係隊史中領軍勝率最高嘅教頭。

杜塞爾多夫護級冇得縮
另一邊廂,尾3嘅杜塞爾多夫現時只落後尾4嘅緬恩斯1分,護級仲未絕望,今季聯賽只剩低6輪,為搶分要焗住要主攻,最佳例子係早前作客科隆,佢哋踢得堅進取,一度領先兩粒,點知防線甩轆,喺最後3分鐘連失兩粒,畀對手逼和2比2,上仗更勇挫史浩克04,但咁嘅豆腐防線,點頂得住有射手羅拔利雲度夫斯基助陣嘅拜仁來襲呀?

翻查紀錄,杜塞爾多夫近5次聯賽對住拜仁入6粒,今場就算輸波,都應該有力破蛋,加上5場交手中有4次總入球達5球或以上,隨時再演入球騷,4.5球嘅大盤咪錯過。