紐倫堡波琴獻細

2020-05-30 08:38:41 来源:网络

火力弱雞唔敢亂嚟
周六晚德乙中下游對決,紐倫堡主場硬撼波琴。兩軍都需要搶分護級,為免輸波益咗同場勁敵,必定小心謹慎,加上波琴客場出擊例必保守,紐倫堡又欠缺贏波本錢,預料今場入波唔會多,中位數2.5球入球細好路。

(on.cc東網周六晚7時直播)

紐倫堡位處下游,只領先尾3嘅卡爾斯魯厄2分,喺聯賽重開之後,紐倫堡3場聯賽只得2和1負,踢3場都仲係開唔到齋,主要係球隊入波能力唔高,雖然3場入咗3球,但有2球分別係前仗對手奧厄,以及上仗對手雷根斯堡送嘅烏龍球,真係由紐倫堡自己射入嘅只得1粒。以表現而論,紐倫堡喺多場比賽都取得控球優勢,射門亦唔少,組織有板有眼,但就係入唔到波,由攻勢轉化成入球嘅能力偏弱,就算前鋒米高費爾今場刑滿復出,恐怕亦未必有好大改善。

玩即場留意兩軍落後難翻身
對手波琴喺德乙入球數字名列前茅,不過大部分來自主場,單計聯賽客場暫時只入12球,係今季德乙作客入球第3少嘅球隊,慶幸佢哋作客失波數字亦唔高,只失18球,失球數字係德乙第2少,令球隊近5場聯賽作客有4場開2球或以下。更加麻煩嘅係,佢哋嘅前鋒西蒙祖拿喺上周末作客悶和卡爾斯魯厄0比0之役傷出,今場上陣成疑,攻力進一步打折扣。既然兩軍都冇乜本錢強攻,現階段各得1分相信係雙方都樂意見到嘅賽果,2.5球入球細當然要玩,亦可以小注和波博收兩瓣。

由於今場有直播,喜愛玩即場嘅球迷可參考一下以下數據,紐倫堡今季6次主場落後0比1,4次輸波2次追和,波琴今季6次作客落後0比1則全部落敗,可見兩軍都冇翻身本錢,大家可以特別留意。