兩度易帥布拉加隨時走晒樣

2020-06-01 09:25:54 来源:网络

布拉加雖然從未染指葡超冠軍,不過佢哋對上5季聯賽都能打入前5名,其中4次獲得殿軍,可以講係傳統Big3以外、近年成績最穩定嘅球隊,升格為Big4之一絕對有根據。布拉加今季開咧不順,頭14場聯賽僅獲5勝3和6負,首季執教嘅沙賓度歇冬前落鑊,改由魯賓艾摩廉接手

古斯杜迪奧係「白紙」領隊  

呢位曾經代表葡萄牙出戰2010、2014兩屆世盃決賽周嘅35歲少帥,成功帶領布拉加翻生,唔單只喺聯賽領軍9戰8勝1和,1月底嘅葡聯盃決賽更以1比0力挫波圖捧盃,贏得今季首項錦標,魯賓艾摩廉嘅出色領導才能吸引到另一支褪色勁旅士砵亭注意,3月初被後者高價挖角,布拉加逼於無奈要一季內兩度易帥,由另一位毫無執教經驗嘅前國腳古斯杜迪奧(圓圖)接手。雖然布拉加於聯賽停擺前以4分領先士砵亭排第3位,不過餘下球季將有魯賓艾摩廉掉轉槍頭,話唔定聯賽排名會出現大逆轉。