士砵亭夠料躋身三甲

2020-06-01 09:28:58 来源:网络

獲神奇教頭加盟

士砵亭對上一次贏得葡超冠軍已經係2001/02球季,不過上季喺荷蘭主帥馬素基爾帶領下,先後喺葡聯盃及葡萄牙盃擊敗波圖,榮膺國內盃賽雙冠王。可惜馬素基爾季初離隊,令士砵亭陣腳大亂,頭12輪聯賽只得6勝2和4負,早早被踢出爭標行列。    

其實今季士砵亭陣中有唔少熟悉名字,例如曾喺英超搵食嘅恩歷克波拿斯、謝斯洛迪古斯,後防線則有兩名前國腳級人馬,包括法國守衞馬菲奧及意大利門神維維安奴,不過中場主力波基斯費南迪斯季中轉投曼聯,對球隊造成一定打擊,而且佢哋今季經常喺關鍵6分波失利,例如主場聯賽先後輸畀波圖及賓菲加,係無緣爭標嘅最大原因。隨住球會喺聯賽停擺前邀得布拉加嘅神奇教頭魯賓艾摩廉加盟,現排第4位嘅士砵亭喺餘下球季絕對唔可以Hea踢,至少要趕過布拉加重返Big3位置先算有交代。