勝利船翻身大作戰

2020-07-08 09:22:01 来源:网络

周三日職開快車,鳥棲砂岩主場迎戰神戶勝利船。勝利船雖屬人氣球隊,但復賽首戰慘敗收場,改踢3人防線即告出事,今場急欲反彈必搶攻,佢哋客場出擊有前冇後,中位數2.5球嘅入球大可取。(有線665及605台周三晚6時直播)

勝利船擅打盃賽,聯賽卻表現飄忽,上季只排第8位,今季首輪賽和FC橫濱1比1,以為聯賽停擺後表現會有改善,點知復賽後首戰主場對廣島三箭竟慘敗0比3。主帥芬克喺該仗突然排352陣式,但習慣4人防線嘅丹卡拿、大崎玲央同渡部博文,明顯未適應3後衞陣式,比利時守將華美倫因傷缺陣,都係大敗主因。好彩勝利船有「小白」恩尼斯達孭飛,配合山口螢、沙治森柏同戴恩費斯杜格拉斯,攻擊力仍有保證,要喺鳥棲砂岩身上取得入球唔難。

鳥棲砂岩失波多
上季護級分子鳥棲砂岩,今季未見起色,頭兩輪聯賽只得1和1負,包括上場淨吞大分三神兩蛋,佢哋上季聯賽失53球,係失球第4多球隊。勝利船為博反彈必搶攻,加上佢哋客場向來有前冇後,連同各項賽事,跨季對上7場作客場場有士哥,其中6次開3球或以上,包括上季聯賽造訪砂岩大勝6比1,今場捧中位數2.5球嘅入球大更佳。

水手格食格勝算高
同晚衞冕球隊橫濱水手喺中立場對實力一般嘅湘南比馬。水手上季勇奪日職冠軍,上仗遭紅鑽逼和一肚火,今場更加會搶攻,既然水手近5次聯賽對比馬4勝1和,優勢明顯,撐水手贏波開主W。(有線664及604台周三晚6時直播)