些路迪殘陣士氣曳 難擋弗爆A米

2020-10-22 13:10:39 来源:网络

意甲榜首AC米蘭今晚歐霸H組作客些路迪;主隊近日受新冠肺炎侵襲,上場打吡戰輸畀格拉斯哥流浪元氣大傷;相反A米喺意甲開季4連勝排榜首,士氣如虹有力再下一城,客勝值捧。(Now 645及有線603周五凌晨3時直播)

伊巴復出狀態更勇
些路迪踢完國際賽後,先後有法國前鋒奧辛尼艾度亞迪、以色列孖寶中場尼亞比頓及後衞艾哈密特確診新冠肺炎,蘇格蘭中場基士堤成為緊密接觸者亦要被隔離,上場殘陣出擊下主場淨吞同市宿敵「格流」兩蛋,士氣受挫;A米王牌伊巴謙莫域中完新冠肺炎後康復過來,上場梅開二度殺退國米,助A米錄得開季4連勝,展現重回聯賽爭標行列嘅實力。伊巴對上2場歐霸因確診未有上陣,不過第2圈外圍賽作客對沙姆洛克流浪,佢就正選披甲兼入波,今次繼續落場搏殺都唔奇。

另一意甲球隊拿玻里喺F組主場鬥荷甲「AZ」阿爾克馬爾,「AZ」上周有多名球員宣布確診,今場踢唔踢得成都未知,馬會暫時亦未開盤受注。拿玻里早前以防疫為由避戰聯賽對祖雲達斯,結果遭賽會判輸0比3兼再扣1分,球會上場發火大炒去季3哥阿特蘭大4比1,如果今場冇受影響繼續進行,拿玻里有力再贏一場。(周五凌晨零時55分開賽)